ºÚÁϳԹÏÍø

Mewn byd mwyfwy cydgysylltiedig, mae diogelu asedau digidol a sicrhau cyfathrebu diogel yn fwy pwysig nag erioed.  Mae ein gradd BSc Rhwydweithiau Cyfrifiadurol a Seiberddiogelwch wedi’i llunio i roi i chi’r sgiliau hanfodol i adeiladu, diogelu, a rheoli seilweithiau rhwydwaith cadarn gan eu hamddiffyn rhag seiberfygythiadau.  Mae’r rhaglen yn pwysleisio’r cydadwaith hollbwysig rhwng rhwydweithio a seiberddiogelwch, gan eich paratoi am yrfa ddeinamig a boddhaus ar flaen y gad ym maes diogelu digidol. 

Gan ganolbwyntio ar dri maes craidd, sef rhwydweithio, diogelwch, a gwaith fforensig, mae’r rhaglen hon yn cyfuno hyfforddiant ymarferol â gwybodaeth ddamcaniaethol.   Byddwch yn datblygu arbenigedd mewn dylunio a chynnal a chadw seilweithiau rhwydwaith cymhleth gan feistroli’r egwyddorion a’r offer sy’n angenrheidiol i ddiogelu’r systemau hyn rhag seiberymosodiadau.  Gyda rhwydweithio’n asgwrn cefn i seiberddiogelwch, byddwch yn dysgu sut mae dealltwriaeth ddofn o bensaernïaeth rhwydwaith yn hanfodol er mwyn dynodi mannau gwan, atal tor ddiogelwch, ac ymateb yn effeithiol i ddigwyddiadau. 

Dan arweiniad academyddion sydd â phrofiad helaeth yn y diwydiant, mae’r cwrs hwn yn adlewyrchu’r tueddiadau a’r safonau diweddaraf ym maes seiberddiogelwch.  Byddwch yn elwa o’n cysylltiadau cryf â diwydiant, yn cynnwys ein partneriaethau â sefydliadau blaenllaw megis Cisco ac EC-Council, gan sicrhau eich bod yn cael mynediad i nifer o dystysgrifau perthnasol megis y canlynol: Llwybro a Switsio gan CCNA, Seiberweithrediadau gan CCNA, Ymchwilydd Gwaith Fforensig Hacio (CHFI) gan EC-Council.  Mae’r cymwysterau hyn yn cael eu gwerthfawrogi’n fawr gan gyflogwyr a byddant yn rhoi mantais gystadleuol i chi yn y farchnad swyddi. 

Mae’r rhaglen yn pwysleisio profiad ymarferol, gan ganiatáu i chi gymhwyso beth rydych yn ei ddysgu mewn sefyllfaoedd yn y byd go iawn.  Byddwch yn gweithio mewn labordai seiberddiogelwch o’r radd flaenaf gyda thechnolegau arloesol, lle byddwch yn efelychu ymosodiadau rhwydwaith, yn datblygu systemau diogel, ac yn ymchwilio i seiberddigwyddiadau.  Bydd y profiadau trochol hyn yn eich paratoi i fynd i’r afael â’r heriau sy’n dod i’r amlwg ym maes diogelwch rhwydweithiau a gwaith fforensig, gan sicrhau eich bod yn graddio â’r sgiliau technegol angenrheidiol i gael effaith ar y maes ar unwaith. 

Bydd eich addysg yn cwmpasu sbectrwm eang o bynciau seiberddiogelwch, o ddylunio rhwydweithiau diogel i ddadansoddi fforensig ar dor ddiogelwch, gan ddatblygu eich galluoedd i ddatrys problemau’n barhaus.  Mae’r rhaglen hefyd yn darparu sylfaen gref mewn gweinyddu rhwydweithiau a phensaernïaeth diogelwch, gan eich galluogi i asesu risgiau, gweithredu mesurau diogelu, a rheoli rhwydweithiau diogel i unrhyw sefydliad. 

Erbyn i chi raddio, byddwch wedi’ch paratoi’n llawn i ddilyn gyrfa lwyddiannus mewn gweinyddu rhwydweithiau, dadansoddi seiberddiogelwch, neu ymateb i ddigwyddiadau.  P’un a ydych yn dymuno amddiffyn seilweithiau hollbwysig, rheoli diogelwch TG i sefydliadau mawr, neu ymchwilio i seiberdroseddu, bydd y radd hon yn darparu’r wybodaeth a’r profiad ymarferol i’ch helpu i lwyddo.  Mae ymuno â’r rhaglen hon yn golygu cymryd y cam cyntaf tuag at ddod yn arweinydd ym maes hollbwysig seiberddiogelwch sy’n tyfu’n gyflym.