ºÚÁϳԹÏÍø

Mae’r Radd Cydanrhydedd Saesneg a Hanes yn cynnig cyfle i chi archwilio dau bwnc diddorol sy’n rhyngberthyn. Mae’r cwrs hwn yn galluogi i chi astudio llenyddiaeth Saesneg a hanes, a’r croestoriadau rhyngddynt, gan ddatblygu’r sgiliau deallusol i fynd i’r afael â’r pynciau hyn o amrywiaeth o safbwyntiau.

Mae rhan Saesneg y radd yn cwmpasu ystod eang o lenyddiaeth o wahanol enres a chyfnodau, o Shakespeare i ffuglen gyfoes, ac yn archwilio themâu a syniadau allweddol sydd wedi siapio datblygiad llenyddiaeth a’r ddealltwriaeth ohoni. Byddwch yn ymgysylltu â theori lenyddol ac arfer dadansoddi llenyddol, gan ddysgu dehongli testunau yn eu cyd-destun hanesyddol ac adfyfyrio ar sut mae llenyddiaeth yn adlewyrchu ac yn siapio cymdeithas. Byddwch hefyd yn cael y cyfle i gynhyrchu ymatebion creadigol i destunau.

Mae rhan Hanes y radd hon yn archwilio hanes Ewrop, yr Unol Daleithiau, a thu hwnt, yn amrywio o Rufain yr Henfyd i’r cyfnod modern. Fe fydd yn galluogi i chi archwilio ystod o ymagweddau thematig at hanes, gan gynnwys hanes gwleidyddol, hanes cymdeithasol, a hanes diwylliannol, gan eich annog i ystyried cyfoeth ac amrywiaeth profiad dyn ar draws amser. 

Byddwch yn dysgu i ddadansoddi testunau a ffynonellau a dealltwriaeth o sgiliau naratif a meddwl beirniadol. Caiff y sgiliau hyn eu profi trwy ystod o asesiadau, o draethodau i brosiectau archif a llyfrgell, i ymatebion creadigol.

Mae’r ddau bwnc yn gweithio gyda’i gilydd i wella eich sgiliau cyfathrebu, gan ganolbwyntio ar sut i gyflwyno syniadau cymhleth yn glir ac yn argyhoeddiadol. Mae’r sgiliau hyn yn werthfawr nid yn unig mewn cyd-destun academaidd, ond ar gyfer ystod o yrfaoedd ar ôl graddio. Erbyn diwedd y cwrs, byddwch yn gallu asesu deunyddiau hanesyddol a llenyddol yn feirniadol, gan ddarparu dehongliadau seiliedig ar dystiolaeth o’r gorffennol ac ymgysylltu â dadleuon diwylliannol, llenyddol a hanesyddol mewn ffordd ystyrlon.

Mae’r radd gydanrhydedd hon yn y Dyniaethau yn rhoi cyfle i adeiladu profiad academaidd cydlynol a gafaelgar, gan gynnig hyblygrwydd i greu cyfuniadau o fodylau sy’n gweddu orau i’ch diddordebau. Drwy astudio Saesneg a Hanes, byddwch yn meithrin dealltwriaeth ddofn o’r cyfnodau hanesyddol sydd wedi siapio ein byd a datblygu’r sgiliau dadansoddol a chreadigol sy’n angenrheidiol er mwyn dehongli llenyddiaeth a hanes.