ºÚÁϳԹÏÍø

Mae cydweithredu â diwydiant yn elfen allweddol o raglenni yn PCYDDS.  Yma, mae Dr Jayne Griffith-Parry, yn amlygu pwysigrwydd partneriaeth o’r fath â’r diwydiant lletygarwch.  Hi yw Cyfarwyddwr Academaidd rhaglenni Rheoli Lletygarwch a Thwristiaeth yn ogystal â’r grym y tu ôl i gystadleuaeth Cogydd Ifanc, Gweinyddwr Ifanc a Chymysgegydd Ifanc Cymru.

Yn y byd coginio sydd ohoni, sy’n datblygu’n gyflym, rhaid i gyrsiau prifysgol mewn gastronomeg sicrhau cysylltiadau cryf â’r diwydiant er mwyn parhau’n berthnasol, yn arloesol, ac yn ddylanwadol. 

Yn PCYDDS, mae cydweithio rhwng y byd academaidd a gweithwyr proffesiynol y diwydiant yn gynhwysyn hollbwysig wrth baratoi’r genhedlaeth nesaf o gogyddion, entrepreneuriaid bwyd, ac arweinwyr lletygarwch.  Mae’r bartneriaeth hon yn sicrhau bod graddedigion â’r wybodaeth, y profiad a’r weledigaeth i ffynnu mewn maes cystadleuol a deinamig.

Mae rhaglenni gastronomeg PCYDDS yn datblygu’n gyflym i fodloni gofynion diwydiant bwyd a lletygarwch deinamig. Wrth i’r byd coginio symud ymlaen drwy arloesi, technoleg, a dewisiadau newidiol cwsmeriaid, mae cydweithio rhwng y Brifysgol a gweithwyr proffesiynol y diwydiant wedi dod yn hollbwysig er mwyn pontio’r bwlch rhwng theori academaidd ac arbenigedd ymarferol. 

Cyfoethogi Sgiliau’r Byd Go Iawn 

Mae ffurfio partneriaethau ag arweinwyr y diwydiant yn cynnig cyfle i fyfyrwyr gael profiad ymarferol sy’n mynd tu hwnt i’r ystafell ddosbarth.  Mae portffolio Gastronomeg y Brifysgol yn cynnwys interniaethau, gweithdai, a mentoriaethau gyda chogyddion, restaurateurs, a thechnolegwyr bwyd, gydag arbenigwyr lletygarwch yn darparu sgiliau a mewnwelediadau ar gyfer myfyrwyr na all gwerslyfrau eu darparu ar eu pennau eu hunain.  Mae’r profiadau hyn yn paratoi graddedigion i fodloni gofynion y diwydiant gyda hyder, gan feithrin creadigrwydd, gallu i addasu, a chraffter busnes. 

Cadw Cwricwla yn Berthnasol ac yn Flaengar 

Mae’r sector bwyd a diod yn esblygu’n barhaus, dan arweiniad tueddiadau megis arferion cynaliadwy, arloesi gyda phlanhigion, a datblygiadau mewn technoleg bwyd.  Drwy weithio’n agos â gweithwyr proffesiynol y diwydiant, nod PCYDDS yw sicrhau bod ei rhaglenni’n parhau’n gyfredol â’r datblygiadau newydd diweddaraf, o arferion o’r fferm i’r bwrdd i’r defnydd o AI mewn gweithrediadau yn y gegin.  Mae hyn yn helpu graddedigion i barhau’n gystadleuol mewn marchnad sy’n newid yn gyson. 

Tanio Arloesi Drwy Ymchwil 

Mae cydweithio â’r diwydiant o fudd nid yn unig i fyfyrwyr ond mae hefyd yn creu cyfleoedd am brosiectau ymchwil ar y cyd.  Gall myfyrwyr a gweithwyr proffesiynol sy’n gweithio gyda’i gilydd, archwilio syniadau, cynnyrch a thechnolegau newydd sy’n gyrru dyfodol gastronomeg.  O ymchwilio i ffynonellau protein amgen i symud ymlaen o ran cynaliadwyedd bwyd, mae partneriaethau o’r fath yn arwain at ddarganfyddiadau ystyrlon sydd o fudd i’r byd academaidd a’r byd coginio ehangach. 

Meithrin Arweinwyr y Dyfodol 

Mae PCYDDS eisoes yn chwarae rôl bwysig o ran siapio dyfodol y diwydiant gastronomeg, gan gydweithio â ffigurau blaenllaw i feithrin datblygiad y genhedlaeth nesaf o arweinwyr coginio.  Fel y deiliad trwydded yng Nghymru am y gystadleuaeth Cogydd Ifanc, Gweinydd Ifanc, Cymysgwr Coctels Ifanc y Byd, nid yn unig y mae hyn yn rhoi cyfle i fyfyrwyr gystadlu ar y llwyfan byd-eang, ond hefyd i gystadlu wrth ochr eu cymheiriaid proffesiynol dan 28 oed sy’n gweithio o fewn maes lletygarwch ar draws Cymru. 

Mae beirniaid y gystadleuaeth yn cynnwys Hywel Griffiths, Cyrus Todiwala, Tom Simmonds, Martyn Guest, Kevin Hodson a James Sommerin. Mae dod i gysylltiad â safbwyntiau mor amrywiol ar y diwydiant yn annog myfyrwyr i feddwl yn fyd-eang, datrys heriau’r byd go iawn, ac  ymgymryd â rolau arwain ar ôl graddio.  

Cryfhau Lleoliadau Swyddi a Chyfleoedd Gyrfa 

Un o fuddion mwyaf arwyddocaol cydweithio â diwydiant yn rhaglenni gastronomeg PCYDDS yw ei effaith ar leoliadau swyddi.  Mae’r lleoliad parhaus dros dair blynedd yn y rhaglen radd yn ymwreiddio myfyrwyr o fewn bwytai, yn caniatáu iddynt ddysgu’n ymarferol ac adnabod eu potensial llawn – cysyniad dysgu unigryw (yng Nghymru) ar y lefel hon. 

Mae perthnasoedd â’n partneriaid yn creu sianel ar gyfer interniaethau, prentisiaethau, a chyfleoedd am waith.  Mae’r partneriaethau hyn yn sicrhau nid yn unig fod myfyrwyr yn graddio gyda gradd, ond hefyd gyda chysylltiadau, profiad a rhagolygon gyrfa sy’n amhrisiadwy.  

Main body of text.

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
¹ó´Úô²Ô:&²Ô²ú²õ±è;07384&²Ô²ú²õ±è;467071