ºÚÁϳԹÏÍø

Mae’r MA mewn Tegwch ac Amrywiaeth mewn Cymdeithas wedi’i chynllunio ar gyfer myfyrwyr sydd am ddeall a helpu i greu cymunedau tecach, mwy cynhwysol. Mae’r cwrs hwn yn archwilio cydraddoldeb, amrywiaeth a chynhwysiant, gan adeiladu gwybodaeth am sut mae’r gwerthoedd hyn yn llunio ein cymdeithas ac yn dylanwadu ar unigolion, teuluoedd, sefydliadau a pholisïau.

Yn y byd sydd ohoni, lle mae pobl o gefndiroedd amrywiol yn gweithio ac yn byw gyda’i gilydd, mae gwybod sut i gefnogi amrywiaeth a chydraddoldeb yn hanfodol. Mae’r radd hon yn meithrin dealltwriaeth trwy feysydd fel polisi cymdeithasol, cymdeithaseg, a theori gymdeithasol a diwylliannol. Gyda sylfaen gadarn yn y pynciau hyn, mae myfyrwyr yn datblygu’r sgiliau i fynd i’r afael ag anghydraddoldebau a chefnogi arferion cydraddoldeb, amrywiaeth a chynhwysiant yn broffesiynol. Er enghraifft, byddwch yn astudio’r polisïau a’r cyfreithiau sy’n diogelu cydraddoldeb, amrywiaeth a chynhwysiant yn y DU, fel  Deddf Cydraddoldeb (2010), DeddfGwasanaethau Cymdeithasol a Llesiant (Cymru) (2014), a Deddf Llesiant Cenedlaethau’r Dyfodol (Cymru) (2015). Mae’r cyfreithiau hyn yn llywio sut rydym yn cefnogi triniaeth deg, yn enwedig mewn addysg a gwasanaethau cymunedol.

Mae’r cwrs yn cyfuno polisi ac ymarfer addysgol gyda’r theori a’r ymchwil addysgol diweddaraf ar gydraddoldeb, amrywiaeth a chynhwysiant, gan helpu myfyrwyr i ddod yn ymarferwyr myfyriol ac effeithiol. Trwy set strwythuredig o fodylau craidd, mae myfyrwyr yn datblygu gwybodaeth ymarferol ac yn dysgu meddwl yn feirniadol am bolisïau cymdeithasol a’u heffaith ar wahanol grwpiau. Mae’r dull myfyriol hwn yn eich helpu i ddeall sut mae polisïau a damcaniaethau cydraddoldeb, amrywiaeth a chynhwysiant yn gweithio mewn bywyd go iawn a sut y gallant addasu i newidiadau cymdeithasol.

Mae hyblygrwydd yn fantais fawr o’r rhaglen hon. Gallwch ddewis astudio’n amser llawn neu’n rhan-amser, ac mae cyrsiau ar gael wyneb yn wyneb, ar-lein, neu gyfuniad o’r ddau. Cynigir dosbarthiadau yn fyw trwy Teams, gyda recordiadau fel y gallwch eu hadolygu ar eich cyflymder eich hun. Mae hyn yn golygu y gallwch ddylunio eich amserlen ddysgu o amgylch eich bywyd, p’un a ydych ar y campws neu’n astudio o bell. Mae’r hyblygrwydd hwn yn ei gwneud hi’n haws cydbwyso’ch astudiaethau ag ymrwymiadau eraill wrth ddatblygu’r sgiliau sydd eu hangen i weithio ym maes cydraddoldeb, amrywiaeth a chynhwysiant.

Mae’r radd ar gael fel MA, Diploma, neu Dystysgrif, gan ei gwneud yn hygyrch ar wahanol lefelau i fyfyrwyr sydd â diddordeb mewn gyrfaoedd sy’n cefnogi cydraddoldeb, amrywiaeth a chynhwysiant, gan gynnwys addysg yn y gymuned a gwaith cymdeithasol. Waeth beth yw eich man cychwyn, mae’r rhaglen hon yn llwybr tuag at ddatblygu gyrfa ystyrlon mewn amrywiaeth a chynhwysiant.

I gael manylion am fodylau, amserlenni a gofynion ymgeisio, cysylltwch â’n rheolwr rhaglen.

Trwy ymuno â’r MA mewn Tegwch ac Amrywiaeth mewn Cymdeithas, byddwch yn datblygu’r wybodaeth a’r sgiliau i helpu i greu byd tecach, mwy cynhwysol. Trwy ddysgu ymarferol a damcaniaethol, mae’r rhaglen hon yn eich paratoi i wneud gwahaniaeth cadarnhaol ym maes tegwch, amrywiaeth a chynhwysiant.